人生太短時間太少 (Patreon)
Content
其實本來做人都唔應該咁認真!但好可惜,可能係巨蟹座掛,我就係做人太認真!尋日都話啦我一起身就要做功課,要睇晒319頁關於FBI啱啱解封嘅UFO檔案,但其實呢個只係我最喜歡調查嘅冰山一角,可能大家都未必知,美國有個自由訊息組織,定期會send email畀我關於佢哋解封左美國政府嘅檔案,講真真係嚇撚死我㗎,範疇同文件之多根本我窮一世嘅精力同時間都睇唔晒,真係每次打開email我都要戰戰兢兢,再加上我乜嘢都八卦、乜嘢都想睇、乜嘢都想知道,咁就死得啦!咁今朝早起身諗下不宜再撳下UFO以外嘅檔案瞄瞄啦⋯⋯頂你個肺,關於CIA係伊拉克嘅外判合約我又想知、特朗普準備發展太空計劃嘅Memo我又想睇、美國藥物控制中心點樣幫藥廠抬高價錢害死病人我又想睇啲文件、甚至每一個州政府詳細到每一個個案嘅解剖報告我都想睇埋、昔日美國情報部門點樣偷聽名人嘅電話錄音系統又好鬼正、最後睇到原來CIA幾份解封文件顯示美國政府經常秘密進行萬聖節大型秘密派對,更加好想好想好想睇,.........!突然間覺得自己根本冇咁嘅時間同精神!坦白講我已經係比一般人類勤力同堅毅㗎啦!可惜我自細都唔係好聰明嘅人,睇嘢都唔算快,唯有都係繼續慢慢努力啦!不過每次見到因為資訊自由法已被解封嘅美國檔案,我就好唏噓,香港政府同中國政府從來都唔會容許呢件事發生,不過冇都好嘅,唔係我10世都睇唔晒!我已經喺呢個世界,算係用盡自己力量調查真相比大家知嘅人嚟㗎啦!都算係咁㗎啦!